التربينات البخاريه(عنفه بخاريه) - مكوناتها - طريقة العمل

ماذا تعنى التربينات البخاريه steam turbine او ما يسمى بالعنفه البخاريه

 

بص ياسيدى التربينه(عنفه بخاريه) اصلا...اه اصلا هى عباره عن جهاز ذو عمود دوار يعنى المهم فى الليله دى اننا ندور العمود ده ممكن ندوره بسائل مثل الماء طبعا بضغط معين ومواصفات معينه بس ده مش موضوعنا المهم نعرف مين الحاجه الاول..

او ممكن تستخدم البخار  زى ما شرحنا فى مقال المحطات البخارية..

البخار هه واخد بالك انت

او غاز او هواء وطبعا استخدامتها كثيره جدا 

ومنهم الاستخدام المهم جدا وهو استخدامها فى تحويل الطاقه الحركيه الى نوع اخر من الطاقه الحركيه وهو طاقة الدوران .

تمام كده ركز معايا متسرحش منى

المهم نروح للنوع اللى هنتكلم عنه النهارده وهو التربينات البخاريه او مايسمى بالعنفه البخارية(steam turbine).

التربينه البخاريه(steam turbine)

بص ياسيدى ..بصيت تمام البخار اللى طلع من الغلايه وعرفنا ازاى ولو عرفتش ارجع للمقال اللى فيه شرح الغلايات البخارية

قشطه كده البخار ده كان طالع متحمص بيدخل على التربينه فيعمل على دوران العمود للتربينه بسرعه مثلا 300 لفه فى الدقيقه وخلى بالك العمود مربوط معاه عمود المولد الكهربى .

اللى هو بنعمل كل ده عشان ندلعه قصدى ندوره وكذلك هو المسئول عن توليد الكهرباء....تمام .

فيدور عمود المولد الكهربائى او ما يسمى بالمولد التربينى بنفس سرعة دوران عمود التربينه اللى هى كام هه 300 لفه فى الدقيقه.

يعنى من الاخر ياجماعه الدوره دى كلها تحت خدمة المولد افندى عشان ندور العمود بتاعه ونحصل على الكهرباء...اظن مافيش ابسط من كده ركز وانا معاك على الهادى خالص مالص.

مكونات التربينه البخاريه(steam turbine)

1. الفوانى 
2. الريش الثابته
3. عمود التربينه وما عليه من عجلات مثبت عليها الريش المتحركه - كراسى التربينه - كراسى الضغط
4. البلوف عباره عن مدخل البخار - خزنة البلوف - بلوف الحمل
5. نقاط الاستخراج وماخذها على التربينه اللى هى نقط الفصد ولا اقولك ما علينا 
6. جلاندات الضغط العالى والمنخفض

ايه الاخبار روحت منى فين اوعى تكون زعلان 

عامتا ياعم اعرف بس اسماء المكونات للعلم بس صدقنى

 هتستفاد ومش شرط تبقى خبير يعنى من باب العلم بالشئ يلا ما علينا.

طريقة العمل

طبعا الفكره الاساسيه عرفناها اللى هى البخار يدخل على التربينه فيعمل على دوران عمود التربينه.

هناك بعض التربينات فى محطات توليد الطاقه الكهربيه يكون العمود بتاعها مثبت عليه اكثر من تربينه يعنى ممكن نحط عليه ثلاث تربينات على العمود الواحد .

ازاى ياعم الكلام ده تعالى معايا ناخذ مثال على تربينه بها عمود مثبت عليه ثلاث تربينات وكيفية عملهم
بس عايزك تركز معايا كويس جدا .

ده المخطط بتاعها

بالراحه كده واحده واحده بص للرسمه دى وانا هاشرحلك الدوره بتتم ازاى انت شايف H.P , I.T , L.P هما دول الثلاث تربينات المثبتين على العمود ركز على دول واعرف اماكنهم عشان لما اشاور لك على حاجه تبقى عارف انت رايح فين.

ركز شويه خلاص هنوصل للزاتونه...
بص ياسيدى بعد خروج البخار من الغلايه البخاريةاللى فى الرسمه boiler يدخل على التربينه الاولى H.P وهى حوالى عشر مراحل متشغلش بالك. المهم!

البخار اللى بيزيد من H.P بيرجع تانى على الغلايه عن طريق R.H وهو ملف اعادة التسخين للبخار الزائد.

وبعد ما يتم تسخينه بيدخل على التربينه الثانيه I.T وهى حوالى ستة مراحل بردو متشغلش بالك المهم.

وبعد كده البخار الزياده بيروح على التربينه الثالثه L.P وفى هذه المرحله يعتبر البخار فقد مواصفاته من الضغط والحراره وهكذا ففى جزء من البخار ليروح من L.P على السخانات اللى فى الرسمه H6 ,H7 ويروح للغلايه تانى.

والتربينه الثالثه متوصله مع المكثف Condenser البخار اللى بيفضل بينزل على المكثف .

طبعا كده عمود التربينه داير زى الفل دلوقتى هه
بس لازم الدوره تستمر مينفعش نسكت على كده
نكمل البخار اللى زاد هينزل على المكثف زى ما قولنا .

والمكثف ده عباره عن مجموعه من المواسير بينشى فيها مياه بارده تأتى من الترعه او مصدر الماء بس خلى بالك دى مياه تبريد فقط مش مياه معالجه ارجع لمقال معالجة المياه.

المهم البخار لينزل على المواسير دى فيتكثف 
فاحنا بنأخذ الميه اللى ناتجه التكثف عن طريق PB , PA طبعا كل ده وانت بتابع مع الرسمه.

دول بقا اسمهم طلمبات المتكاثف بياخدو الميه وتمر على السخانات H1 , H2 , H3 , H4 , H5 ...خلى بالك فى السخانات دى التسخين بيكون عن طريق نقط الفصد اللى واخدينها من التربينات Bleding Points المهم النقطه فيها تفاصيل كتيير ما علينا منها.

بعد ما تم التسخين شايف فى الرسمه ثلاث طلمبات تحت تنك التغذيه دول اسمهم طلمبات التغذيه دول بقا بيرفعو الميه بعد ما سخنت الى تنك التغذيه Feeding Tank

 وهو متوصل بالموفر Economizer فاكيرنه اللى هو اول جزء فى الغلايات البخارية ارجع للمقال بتاع الغلايه وهو بيسلم الميه للغلايه.

وتستمر الدوره على هذا المنوال عشان يستمر دوران عمود التربينه ومنها يستمر دوران عمود المولد دون اى اى ت فى السرعه ويستمر توليد الطاقه الكهربيه عن طريق المولد الكهربى

وهذا ما سنتحدث عنه فى المقال القادم
اشوفكم فى مقال جديد ومعلومه سهله وخفيفه انتظرونى..